Wan Phai Ban Pynbha Biang

image

Sa shi sien, la kha biang ia me, la kynmaw ieid biang namar ba ki wah ki la rngat bad ki miet, kjam. Mynta ki sla ki la iap bad ki lum, syllen. La dei ka por wad jingkyrmen biang. Kumta hi ha ki sngi kha. Man u snem u wan noh ha PB, bad ki briew kim klet ban wan mane ia u. Ki wan dem ha me uba sympat ia ki nongkhayi; ha iew.

Ki thrang ban iohi ia ka jingwan arsien jong me. Kumno men wan? Kum ka eriong bad leilieh? Kum ka wait bad sum? Kum u jumai bad ding? Ne kum ka Pyrem bad ki sla jyrngam? Kum ka Erbatemon bad um pjah? Kum ka Jingkmen bad ki kot thymmai?

Wan, wan ban pynbha biang. Tangba lada me wan, kyrsiew shwa, kum ia u Lazarus, ia kito ki ba shah thang im ha ki por iakhih ki sengbhalang. Kyrsiew ia baroh kiba shah thombor tang namarba ki pher na ngi. Kyrsiew ia kito kiba pynrit mynsiem ha khmat kiba heh, kumjuh kiba shah bein tang namarba kim mane ia me. Kyrsiew khamtam ia ki dohnud maw jong ki nongbud jong me. Pynum ia u thah uba sop ia ki mynsiem jong ki.

Wan, wan ban pynbha biang. Ai biang ha ka Elaka Sutnga bad Elaka Narpuh ia ki tyllong um ba khuid, kibym ai jingpang ia kiba dih ne sum ha ki. Kumjuh ha Byrnihat bad Nongtalang.

Lada me wan ban pynbha shisha, pynbha ia kine ki khlur rit bad ophisar kiba shong ha khmat iingmane. Pyni ka dur shisha jong me ha ki. Ba me kham ia jan bad ki nongkhrong ban ia ki saipan, ba me shong bad ki nongdiekwai, ba mem pat ju poi sha Times Square, ba mem shym beh ia ka burom ne spah hapor ba me dang im ha pyrthei.

Lada me wan shisha, wan biang na trep na sem mrad; wan biang kum u nongpynim jong ka shnong ka thaw; u nongpyrsad mynsiem ia ka imlang sahlang; wan biang kum u nongpyllait im ia ki mraw.