Home » Prose » Ki Por Khynnah Ha Mawlai

Ki Por Khynnah Ha Mawlai

Mynshwa, ha ki por ba nga dang rit, nga kynmaw ba ki paraklas ha ka skul jong nga, kaba ha Laitumkhrah, ki shait kren bein bha ia ka Mawlai. Ki ju ong ba ki nong Mawlai ki dang biej, ki dang sah ha ka jingdum bad ki dang sahdien. Tangba mynta pat ynda nga pyrkhat bha ia kito ki ‘tien sin jong ki, kito ki ktien kiba pynmong; kito ki juh ki ktien ki kylla long kiba kor bad ki wanshat ha ka jingmut jong nga ia ka dor jong ka jinglong jong u nongMawlai.

Ha ki por khynnah, nga kynmaw ba bun ki nongsor  ki bein ia u nong Mawlai ba u long u nongkyndong ha bun ki liang. Ha Shillong, ka Mawlai ka dei shnong  kaba pdiang sbun ia ki paradoh para snam  kiba wan na ki thain bapher bad khamtam eh na ka thain Sepngi jong ka Ri, kiba wan sha sor Shillong ban trei ban bylla bad ban pynheh pynsan ia la ki khun ki kti. Kumta kane ka jingsngew kohnioh jong ki nongsor ia u nong Mawlai ka pyni de ia ka jingwit jong ki ia kiba wan na nongkyndong. Haduh mynta ka dang don katta ka jingkynthoh u nongkyndong, u Maram, u War, u Bhoi bad peit I bein ia ki. Hapdeng ka jingshah ibein  ka don ka mynsiem  sngew sarong ban shah khot u nong Mawlai, kaba haduh mynta ruh ka dang don hynrei nga I kumba ka nang duh bor man ka sngi. Kito ki jing ong ba u nongMawlai u dei uba nud, uba pyneh beit  ki long de ki ba pynkynmaw ha ngi ia ka jinglong tynrai jong ngi ba ngim dei ki briew kiba suk ka jingim .  Haduh mynta dang don kiba  ngeit ia kane – ba ki nong Mawlai ki dei ki paia kiba bah ia ka Ri bad Jaidbynriew.

Ha ki por ba nga dang rit, nga shait shu peit napoh iing, ia la ki paralok kiba leit rung sha khlaw ban siat sim ne leit tong doh na wahduid. I mei im ju shah ia nga ban leit lang namar ba i tieng ioh jia eiei. Nga sngewthuh hi ia ka jingartatien jong i, hynrei balei ba ki kmie ki kpa jong kitto kiwei pat para khynnah kim sheptieng ? Ka daw ka lah ban long namarba ki kmie ki kpa jong kitto kiwei pat ki khynnah ki ju mlien ban rung khlaw . Kumta ka khlaw ha ki kam long nongwei ne ba  kan dei kaei kaei kaba kin tieng bad kiar, kumba ka long ia ki nongsor.  Ia kiba na nongkyndong,  ka long pynban kum ka madan lehkai ha kaba ma ki, lem bad ki khun jong ki, ki lah ban  pyndonkam  da jingsngew heh mynsiem bad ka jingsngewshngain. Kane ka leit ‘kaikhlaw ka pynshlur ia ki khynnah bad lehse ka dei kane ka jingmlien kaba pynmih ia ki swar ba satar jong ka Jaidbynriew.

Ha Mawlai, phi dang ioh lad ban ri sniang ha kper, ban leit ‘kaikhlaw bad hangta ban syang doh, khar tit, tih sohpen, thung sohkhia bad kumta ter ter. Ka Mawlai ka dang shah ia ngi ba ngin im bad roi wat la ngi don tang khyndiat ka pisa ha pla. Hangno lah ban ioh kum kane ka jingim laitluid  ha Sor Shillong? Kaba kham  sngewtriem shuh shuh ban pyrkhat kalong shaphang ka jingkyrduh tasam  bad ka jingim mraw ha kane ka juk kaba lah shilliang. Kan wan sa ka New Shillong! Sa mano ban shah peit bein? Hato kita kiba thmu ban tei ia ka Sor Thymmai ki  ju pyrkhat mo ia ka jingthiang ka jingim laitluid kaba ngi la ioh teng ha Mawlai

Ym lah ban len ba ka shnong Mawlai ka dei ka shlem jong ka Shillong. Ha kitto ki ar ne lai snem, ba nga don shabar Ri,  wat la teng teng nga klet ia la ka shnong, pynban ka jinglong nong Mawlai ka sah hapoh jong nga. Nga kynshew bha ia kata ka jinglong bad nga sngewthuh mynta ba don kaei re kaei hapoh jong nga kaba khynniat ia ka dohnud bad kaba kyntu de ba ngi dei ban tur da ka jingshlur halor ki nongrim, bad ban ieng na ka bynta ka hok jong kiwei – ki rangli-ki juki, ki nongbylla sngi, ki nongtrei kynta bad kumta ter ter.

Nga bitar  haba ki nongsor ki khein poh ia ki nongkyndong. Ki sngew sarong ia la ka riam ka beit, ka jingtbit kren phareng bad ka jingnang ia ki dustur mynder, khlem da pyrkhat jylliew bha halor kine. Kaba sngew sih kadei ba kiba kham shemphang, ki pyndonkam pat ia la ki sap ban kjit snam na ki thied jong ka Jaidbynriew. Ngi kam ialade kum ki Laloo, ki Mawthoh, ki Warjri tangba ngim dei shuh ki tribal lait tang ha ka kyrteng. Bun na ngi ngi ki la klet ia la ka tynrai, ngi la klet ia ka jingmut jong ka jinglong tribal. Kane kam mut ba ngi hap leit phai biang sha ki sngi ba rim, hynrei ba ngi dei ban roi ban san ryntih lang, ban iada ia la ki shnong, ban iada ia ki paradoh parasnam na ka jingthombor. Kane kein kadei ka jinglong tribal! Ban ia tylli ha khmat ki jingeh kiba thmu ban pyndam ia ngi nangne na slakhyndew.

Ha ki por ba nga dang khynnah, nga kynmaw ba don tang khyndiat eh ki iing  kiba la ioh ban ring cable ha ki  TV bad ka iing jong ngi ka dei kawei na kita.  Namarba ka karma buh tv ha iing ka phai sha surok, nga shait hap ban pyni cartoon (phlim boit) ia ki para khynnah dong. Khnang ba kin ioh peit , nga shait hap ban da plie ia ki jingkhangiit lem bad ki pyrda ba kin iohi bha. Ki shait ia shong dngong halor ka kynroh iing jong ngi haduh ban da wan tan ki kmie ban pynsum ia ki. Wat lada ngam shim da nang pyniadei bha bad ki ha kito ki por khynnah, namarba ka jingsngew iapher kyrdan, pynban ngi dang ia don hi ka jing iaieid para khynnah.

Mynta pat, nga ima ban peit ba ki khynnah heh kyrdan kim don jingiadei eiei shuh  bad ki khynnah ba wan na ki  longiing ba duk. Nga bein ia kane ka jingsngew sarong jong nga kaba nga shait bat mynshwa bad lada ngi kwah shisha ban pynkhie im ia ka Jaidbynriew ngi hap pynpra ia ki kynroh kyrdan.

Ha kine ki sngi, I kumba ki ba duk ki la nang shah beh na Mawlai, ki poi sah sha ki ranab lum bad ki rudnong, ym ha pdeng shnong. Don ki paralok ba na sor, ki pynroh mynta ia ka Mawlai bad ki ong ade mynta ka Shnong Mawlai te ka la kham shai, tang namar ba ki la bun ki iing armala ne iing ba itynnad. Hynrei nga sngewrem, lada ka Mawlai ka kylla long ka shnong tang na ka bynta  kiba bit ba biang hangta te ka Jaidbynriew kan nym don shuh ki ‘riew shlur kiba nud ban tur. Ngi dei ban long biang ki khynnah ki bym pyrkhat ei ei shaphang kata peit  ka kyrdan, ka pisa, ka bor, ka burom bad ban ialong paralok bad baroh kiba ngi iashem.

Advertisements

4 thoughts on “Ki Por Khynnah Ha Mawlai

  1. ka ladei eh ka por ban wanrah ia ka jingiatylli, ki mynsiem trei ban rad dyngkhong ia ka jingsniew ha ka imlang sahlang

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s